احمد الحوتي: مساجلة الشاهي

يعود تاريخ هذة المساجلة الي ايام الحرب العالمية الثانية وهي تتناول الحديث عن الشاهي الذي ندر وجوده وقتذاك نتيجة لظروف الحرب ومانشأ عنها من نقص في مواد التموين وقد تمت هذة المساجلة في مدينة جالو واشترك فيها الشعراء عبد الله مفتاح النفار وعبد الله العباسي ويونس بو صفحة المغربي وتجدر الاشارة ان رأي الشاعر الكبير رجب بوحويش ياتي خارج اطار المساجلة وقد قمت باضافته لانه يتناول نفس الموضوع وهيا نقرا ماقاله شعرائنا في موضوع (الشاهي)……

ابتدأ الشاعر عبد الله مفتاح النفّار المجبري (موجها الكلام للشاهي) وقال:

حنا قبل درنا ورد وانتا عله.. كيف جيت للعظم الصحيح اتحلــــه

مانك باهي.. مسلّط عڵـى الواشون كل دواهـــــــــــــــــــــــــــــــــــي

ان كان ماحضرت البيت يبقى ساهي.. يقدّم علي عيشه بلا بسمله

مغير اخســـــــــــــــــــــــــــــــــــــاره.. المساكين ماخلا عليهم بـاره

م الصبح للمغرب وهي تجــــــــــارا ..ان ماحصلوه تبات ليله غله

انتي مره.. وانتي بقيتـــــــــــــــــــــــــــــــــــــــــــي للانسان مضره

كيف الخدم ياناس كيف الحره.. ريت الحيا منهم تبرّم كلـــــــــــــه

انتــــــــــــــــــــــــــــــــــــي شينه.. رقيق الجهد منك غرق في دينه

من قبلا يصلي فيك يقلب عينه.. شينه خباره خاطيــــــــات الملــه

مانطيق افراقــــــــــــــــــــــــــــــــــــه.. مغير هذا واخذنا بلا بنداقه

طايبين ع الذمله بلا سواقه.. في شانهــــــــــا الحمل الثقيل انقله

خذانا كيفه.. دون بالطفل* كمين مية جيفـــــــــــــــــــــــــــــــــــــه

ومن قلالي يعجبك توصيفــــــــه.. بديّن اعظامه بيض كيف الهله

ماو محلل فيها.. وين هو المذهب اللي طاريهــــــــــــــــــــــــــــــــا

يفتح اكتابه كان فيه القيها.. بـــــــــــاب الشريعه ياعرب نركن له

ان كان هي مبدوعه.. خاطي كلام الله هو وشروعــــــــــــــــــــــــه

ماعـــــــــاد خلّت فرش في مربوعه.. غير العوايز يفرغن بالسله

نسال القاضي.. كان في كتابه م الزمان الماضــــــــــــــــــــــــــــي

عينــي تبي والقلب ماهو راضي.. اللي تبع نفسه ع الهلاك ادله

للهلاك اتجيبـــــــــــــــــــــــــــــه.. هاذي حشيشه يا اسلام عطيبه

عليك يا العباسي انعل سريبه.. افتح كلامي وامتبه بالملــــــــــه

فرد الشاعر عبد الله العباسي وقال:

شربه باهي.. يجلي دراه الكبد تبقى زاهـــــــــــــــــــــــــــــــــــــــــــــي

حشيشه حلال وماعليهــــــــــــــا ناهي.. يلذ شربها وين الثمن يتعلى

وهي منصوبه.. عليها القرايـــــ///ــــــــــــــــــــــه والصلاه امحسوبه

وحتــــــــى الطرقي كان باطل دوبه.. يزهى معا السخان وين رطن له

ويجفل النوم الليل تحت اهدوبه.. ويقدر علي صلبه نهارا كلـــــــــــه

شربــــــــــــــــــــــــــــــــــــــــــــــه طيّب .. ولانقدر وا عنه نهار انغيّب

وان عطشته حتـــــى البعيد اقريّب.. الباطل القي كرعيه يجارن لـــــه

ولا عاد في دوره القيت مريّب.. باقي مثيل الفرض مـــــــــــــــايتخلى

يدقّل سخانه.. كما ثلب هايج والابكار اركانــــــــــــــــــــــــــــــــــــــــــه

ونعناع يغشي يعجبك فو جانه.. وسكر محــــــــــــاقن اتلج من قرطله

والع فينــــــــــــــــــــــــــــــــــــــــــــــــا.. وان الغدا والصبح كان القينا

وان غيّب الراس وجعه ناض علينــــــا.. فيه انهمكنا والارزاق ع الله

ووين يحصلّن بارات بين ايدينا.. نعدوا منابه كيف باب الغلــــــــــــه

لاتتركهــــــــــــــــــــــــــــــــــــــــــــــــــــا.. ميط م الخلوق بشربها تتفكّا

ان ماذقتها بعد الغدا تتكى.. يروّح سبيب النوم جارد كلـــــــــــــــــــــه

يدورد عليك تركّ شينك ركــــــــــــــــــــــه.. لاتدير حاجه لاصلا تصلى

بيه ولعنا.. وعشنا علي شربه منين طلعنــــــــــــــــــــــــــــــــــــــــــــــا

لانقبلوا ناهي ولايقدعنــــــــــــــــــــــــا.. يدبّر علي روحه يفوت معله

لقيناه كيف وغيبتنا توجعنـــــــــــــــــا.. غالي غلا ماو كذب نزاين له

كان الطعام اشوي ماشبعنا.. وين نشربوا منه ايرد الغلــــــــــــــــــــه

كي نفسنا كي الضيف كيف تبعنا.. ان غاب سكرّه صاده انا راكن له

وقال الشاعر يونس بوصفحه ( موجها الكلام الي عبد الله النفار)

ليش تقرض فيها.. وانتا زروق الشمس تشرب فيهـــــــــــــــــــــــــا

وف القايله مازلت متكفيها.. وفي العصر تنصبهـــــــا تجي ماشالله

والرابعه ف الليل ماتنساهـــــــــــــــــا.. وان جاك خاطر رزقها يدلى

في مذهبك قايل حرام اشربها.. كيف مافتل لـــــــــــــي نا اللي نفتله

نسأل القاضـــــــــــي كان حرّم فيه.. يباتن علي احقوق في شرع الله

لاتقول مصيبه.. مبني عليها البيت ف التركيبـــــــــــــــــــــــــــــــــــه

نطيحوك ع العباسي وتبقوا طيبه.. الا رزق بونــــــادم شبوهة ظله

ولاتريد تقدرها ان قلت عطيبه.. هالوطن متكاصـــــــــــي عليها كله

والعين بيها مايقولوا عيبه.. كيف الغني كيف الفقيــــــــــر اي والله

حــــــــــــــــــــــــــــــــــــــاله باهي.. اللي يدير عزم وينبسط بالشاهي

لاهو حرام ولايجيب دواهي .. ولا في حديثه عيب وين اتعلــــــــــــه

ولايقرضوك ان بعت فيه شواهي.. ولايعايروك ان جبت من باب الله

باهي ديما.. ودك اتديره ساعة التلحيمــــــــــــــــــــــــــــــــــــــــــــــــه

وشربه اربع مرات حـــــد القيمه.. واللي ايجيبها بالدين ما يمكن له

هذة المحاورة اڵـتي تمت بين الشعراء الثالثة وهناك رأي اخر للفقيه الشاعر

رجب بوحويش بمناسبة تخيض عدد (ادوار الشاهي)  في منطقته من ثلاثة الي اثنين

يسرنا تقديمه لكم اخوتي الكرام وهيا بنا نطلع عڵـى رأي فقيهنا رجب بوحويش حيث قال:

يامن قبّ الثالث قبه.. واذهب طبه.. واجعنه قاصر ع الجبـــــــــه

من قب الثالث ويريده.. عولــــــــــــــــــــــــــــــة هم ونوع تجاره

فقر وضيق الله ايزيده.. واجعنه مبلي بخســـــــــــــــــــــــــــــــاره

عن نص الطاســـــــــــــــــــــــــــــــه ماايزيده.. لا وفىّ لاثالث داره

يالطيف اليد شديده.. حتى ع الواشـــــــــــــــــــــــــــــــــون حزاره

فات الوتر وخـــــــــــــــــــــــــالف سيده.. نقّص م الورد اللي داره

يستاهـــــــــــــــــــــــــل حبس وتمديده.. نين السوط ايذوق مراره

من واسع جاهه تصعيده.. غاضب ربه.. ع اللي دار اثنين وصبّا

مع تحياتي الباحث احمد الحوتي

ahmed_alhuoty@yahoo.com

(إعادة نشر)

 

* بالطفل: مكان به مياه سطحيه يبعد عن جالو اربعين كيلو متر كان

اهل الواحه يجلبون منه الماء الحلو الذي يستعملونه في اعداد الشاهي….
المصدر: ديوان الشعر الشعبي الجزء الثاني منشورات جامعة قاريونس (بتصرف).